26న హైదరాబాద్‌లో హారిస్ జయరాజ్ మ్యూజిక్ కాన్సర్ట్

హైదరాబాద్‌లోని సంగీత ప్రియులను ఉర్రూతలూగించేందుకు ప్రముఖ సంగీత దర్శకుడు హారిస్ జయరాజ్ సిద్ధమయ్యారు. ఆయన నేతృత్వంలో జరగనున్న భారీ లైవ్ కాన్సర్ట్ ఏప్రిల్ 26న నగరంలోని బౌల్డర్ హిల్స్‌ వేదికగా అత్యంత వైభవంగా నిర్వహించనున్నారు. ఈ వేడుకకు సంబంధించిన వివరాలను వెల్లడించేందుకు ఏర్పాటు చేసిన మీడియా సమావేశంలో హారిస్ జయరాజ్ మరియు సింగ‌ర్ కారుణ్య పాల్గొని ఆసక్తికర విశేషాలను పంచుకున్నారు.

చాలా కాలం తర్వాత హైదరాబాద్‌లో షో నిర్వహిస్తుండటంపై స్పందిస్తూ, ‘ఆరెంజ్’ సినిమా రీ-రిలీజ్ సమయంలో తెలుగు ప్రేక్షకులు చూపించిన అపారమైన ప్రేమ, స్పందన చూసి ఆశ్చర్యపోయానని, అదే ఉత్సాహంతో ఈ ప్రత్యేక ప్రదర్శనను ప్లాన్ చేశానని హారిస్ జయరాజ్ తెలిపారు. ముఖ్యంగా ఆరెంజ్, వాసు, మరియు ఘర్షణ వంటి చిత్రాల్లోని ఎవర్‌గ్రీన్ పాటలు ఈ కాన్సర్ట్‌లో ప్రత్యేక ఆకర్షణగా నిలవనున్నాయని ఆయన హామీ ఇచ్చారు. ఈ కార్యక్రమం యొక్క మరో ప్రధాన విశేషం ఏమిటంటే, సుమారు 13 మంది ప్రముఖ గాయనీగాయకులు ఇందులో పాల్గొంటున్నారు, వీరంతా తాము పాడిన ఒరిజినల్ సాంగ్స్‌నే వేదికపై ప్రత్యక్షంగా పాడనుండటం విశేషం. ఇంత మంది దిగ్గజ గాయకులను ఒకే వేదికపైకి తీసుకురావడం మరియు వేల పాటల నుంచి కొన్నిటిని ఎంపిక చేయడం సవాలుతో కూడుకున్న పని అని ఆయన పేర్కొన్నారు. జోరా క్లబ్ ప్రతిష్టాత్మకంగా నిర్వహిస్తున్న ఈ వేడుకను అంతర్జాతీయ సాంకేతిక ప్రమాణాలతో, ప్రేక్షకులకు సరికొత్త అనుభూతిని ఇచ్చేలా తీర్చిదిద్దుతున్నారు. ఈ ప్రెస్ మీట్‌లో జరిగిన క్యూ అండ్ ఏ సెషన్ అభిమానుల్లో మరింత ఆసక్తిని పెంచగా, ప్రస్తుతం ఈ కాన్సర్ట్ టికెట్లు ‘డిస్ట్రిక్ట్ బై జోమాటో’ యాప్‌లో అందుబాటులో ఉన్నాయి. ఎంతో ప్రతిష్టాత్మకంగా జరుగుతున్న ఈ సంగీత విభావరి నగర చరిత్రలో ఒక మైలురాయిగా నిలిచిపోతుందని నిర్వాహకులు ధీమా వ్యక్తం చేస్తున్నారు.