‘అవెంజర్స్ ఎండ్‌గేమ్: ఎంకోర్’కు భారత్‌లో భారీ స్పందన

మార్వెల్ సినిమాటిక్ యూనివర్స్ (MCU) అభిమానులు మరోసారి తమ అభిమానాన్ని చాటుకున్నారు. రస్సో బ్రదర్స్ దర్శకత్వం వహించిన బ్లాక్‌బస్టర్ చిత్రం ‘అవెంజర్స్: ఎండ్‌గేమ్’ రీ-రిలీజ్ అయిన ‘అవెంజర్స్ ఎండ్‌గేమ్: ఎంకోర్’కు భారత్‌లో భారీ స్పందన లభించింది. బాక్సాఫీస్ మోజో ప్రకారం, ‘అవెంజర్స్ ఎండ్‌గేమ్: ఎంకోర్’ ప్రపంచవ్యాప్తంగా తొలి వారాంతంలో సుమారు 86 మిలియన్ డాలర్లు వసూలు చేసింది. ఇందులో ఉత్తర అమెరికాలో 26 మిలియన్ డాలర్లు, అంతర్జాతీయ మార్కెట్లలో 60 మిలియన్ డాలర్లు కలెక్ట్ చేసింది. దీంతో థియేట్రికల్ రీ-రిలీజ్‌లలో ప్రపంచవ్యాప్తంగా అత్యధిక ఓపెనింగ్స్ సాధించిన చిత్రాల్లో ఇది రెండో స్థానంలో నిలిచింది.

ఈ చిత్రానికి భారత్ కూడా భారీగా సహకరించింది. తొలి వారాంతంలో ఇండియాలో సుమారు 2.8 మిలియన్ డాలర్లు (దాదాపు రూ.25 కోట్లు) గ్రాస్ కలెక్షన్స్ వచ్చినట్లు అంచనా. దీంతో ప్రపంచవ్యాప్తంగా అత్యధిక కలెక్షన్స్ అందించిన మార్కెట్లలో భారత్ 5వ స్థానంలో నిలిచింది. భారత్ కంటే ముందు అమెరికా 26 మిలియన్ డాలర్లు, చైనా 13.5 మిలియన్ డాలర్లు, యూకే 5.4 మిలియన్ డాలర్లు, మెక్సికో 4.3 మిలియన్ డాలర్లతో ఉన్నాయి.

ముంబై, ఢిల్లీ NCR, బెంగళూరు, హైదరాబాద్, చెన్నై వంటి నగరాల్లో మార్వెల్ అభిమానులు మరోసారి థియేటర్లకు క్యూ కట్టారు. ముఖ్యంగా కెప్టెన్ అమెరికా చెప్పే “Avengers, Assemble!” సన్నివేశంతో పాటు ఐరన్ మ్యాన్ త్యాగం వంటి ఎమోషనల్ సీన్లను బిగ్ స్క్రీన్‌పై మరోసారి చూసేందుకు అభిమానులు ఆసక్తి చూపిస్తున్నారు.

‘అవెంజర్స్ ఎండ్‌గేమ్: ఎంకోర్’ ప్రస్తుతం భారత్‌లో ఇంగ్లీష్, హిందీ, తమిళం, తెలుగు భాషల్లో థియేటర్లలో విజయవంతంగా ప్రదర్శితమవుతోంది. ఈ సినిమాను IMAXతో పాటు మార్వెల్ స్టూడియోస్ అందిస్తున్న కొత్త ప్రీమియం లార్జ్ ఫార్మాట్ INFINITY VISIONలో కూడా వీక్షించవచ్చు. ఈ స్పెషల్ ప్రెజెంటేషన్‌లో ‘అవెంజర్స్: డూమ్స్‌డే’కు కనెక్ట్ అయ్యే అదనపు సన్నివేశాలు కూడా ఉన్నాయి. ‘అవెంజర్స్: డూమ్స్‌డే’ 2026 డిసెంబర్ 18న ప్రపంచవ్యాప్తంగా థియేటర్లలోకి రానుంది.